Tiranë, 17 Shkurt 2016- ALO 116 – Linja Kombëtare e Këshillimit për Fëmijë me mbështetjen e UNICEF hapën sot fushatën kombëtare ndërgjegjësuese në shkolla nën temën: “Të drejtat e Fëmijëve dhe ALO 116”. Hapja zyrtare e kësaj fushate u zgjodh të zhvillohej pranë shkollës 9-vjeçare “Ali Demi” Tiranë.
Duke filluar nga sot, e në muajt në vazhdim, stafi i ALO 116 do të vizitojnë dhe takohet me fëmijët në shkollat e mbarë vendit, në një fushatë ndërgjegjësimi në lidhje me të drejtat e fëmijëve dhe shërbimet e linjës së vetme të këshillimit për fëmijë e të rinj në Shqipëri, ALO 116, e cila këshillon 24 orë në ditë, 7 ditë të javës.
ALO 116 ka një eksperience të gjatë këshillimi dhe orientimi në shkolla. Fushata e këtij viti, do t’iu vijë në ndihmë të gjithë fëmijëve dhe të rinjve të shkollave 9-vjeçare dhe gjimnaze, të cilët do të kenë më shumë mundësi të njihen me të drejtat e tyre dhe shërbimet e këshillimit psikologjik, të marrin informacion mbi shërbimet ndihmëse dhe të referimit të rasteve të dhunës etj.
Aktitiviteti pranë shkollës 9-vjecare“Ali Demi” u zhvillua në formën e një ore ndërgjegjësuese dhe bashkëbisedimi të lirë midis fëmijëve dhe stafit të ALO 116, me qëllim njohjen dhe promovimin e të drejtave të fëmijëve. Gjate aktivitetit u diskutua për respektimin e të drejtave të fëmijëve në mënyrë që fëmijët të kenë mbështetjen e institucioneve, por edhe të shoqërisë në përgjithësi. Gjatë aktivitetit fëmijët u njohën edhe më shërbimin ALO 116, misionin, qëllimet dhe shërbimet që ajo ofron si dhe politikat gjithpërfshirëse mbi të cilat operon Linja në mbrotjen dhe promovimin e të drejtave të fëmijëve në të gjithë Shqipërinë.